imewekwa Tar: October 3rd, 2017
Mkuu wa Mkoa wa Rukwa Kamishna Mstaafu Zelote Stephen ameishauri benki ya NMB kufungua tawi katika bonde la Ziwa Rukwa ili kusogeza huduma hiyo karibu na wananchi ambao shughuli zao kubwa za kiuchumi ni kilimo cha mahindi, mpunga pamoja na uvuvi.
Amesema kuwa kwa kufanya hivyo kutaepusha matukio ya uvamizi na mauaji yanayofanywa na baadhi ya watu wanaowavizia wakulima na wafanyabiashara wanaoweka fedha majumbani mara tu baada ya mauzo ya mazao yao.
“Mimi nashauri Benki ya NMB muwe na Tawi huku, si lazima kuwa na jengo, hata ile Mobile Banking ambayo mwananchi anaweza kupata huduma zote za kuweka na kutoa fedha katika gari hiyo, ili fedha zao hawa ziwe katika mikono salama,” Mh. Zelote Alisema.
Ametoa ushauri huo katika ufunguzi wa siku ya huduma kwa wateja iliyofanywa na benki ya NMB kanda ya nyanda za juu katika Kijiji cha Mfinga, kata ya Mfinga, Wilaya ya Sumbawanga, kabla ya kukabidhi vifaa vya shule pamoja na hospitali vyenye thamani ya Shilingi milioni 20.
Sambamba na hilo Mh.Zelote amewahamasisha wakulima pamoja na wafanyabiashara wa Kata ya Mfinga kufungua akaunti benki na pia kujiunga katika vikundi ili kuwa na urahisi wa kupata mikopo na kuweza kuwainua kiuchumi.
“Mbali na kuhifadhi fedha pia benki inatoa mikopo kwaajili ya kujiendeleza na hatimae kuwainua wakulima waweze kuongeza thamani ya mazao yao na kupata soko pana hasa katika awamu hii inayoongozwa na Rais Dk. John Pombe Magufuli inayohamasisha uchumi wa viwanda kwa taifa,” Alisema.
Aidha aliwataka viongozi wa Kijiji na wanufaika wa vifaa hivyo kuvitumia vifaa hivyo kwa malengo yaliyokusudiwa na ikiwemo kuwahudumia wananchi bila ya bugudha na kuonya kuwa wananchi wasiogope kuwashitaki watumishi wanaowahudumia kwa viburi.
Awali akisoma taarifa fupi ya Benki ya NMB Mkurugenzi wa Huduma kwa wateja makao makuu ya benki hiyo Richard Makungwa alisema kuwa Benki ya NMB hutenga asilimia moja ya mapato kwa mwaka ili kuirudishia jamii na kuweza kuisaidia katika mambo mbalimbali ikiwemo elimu na afya.
“Kwa kuunga mkono juhudi za Rais wetu tumeamua kama Benki kutoa kompyuta 7, vitanda 8 vya kulalia, vitanda 4 vya kujifungulia, magodoro 8 pamoja na mabati 204 vyote vikiwa na thamani ya shilingi milioni 20 vilivyotolewa na benki hiyo kama marejesho ya faida kwa wateja watu,” Alisema.
Kwa upande wake Mwenyekiti wa Kijiji hicho Godfrey Kalungwizi aliahidi kuvisimamia vifaa hivyo na kuendelea kuwahamasisha wananchi kuchangia katika shughuli za kimaendeleo.
